મજાની હોળી
મજાની હોળી
તું લઈ લેને ગુલાલ હાથમાં ઘોળી
હું લઈ અબીલને રંગોમાં ઝબોળી
ચાલને રમીએ રંગોથી મજાની હોળી,
તું પહેરી લે પાઘડી માથે પહોળી
હું ઓઢી લઉં ચૂંદડી મોરલાવાળી
ચાલને રમીએ રંગોથી મજાની હોળી,
તારા હાથમાં લઈ મારી હથેળી
રંગોની કરીએ એકબીજા પર હોળી
ચાલને રમીએ રંગોથી મજાની હોળી,
રંગોથી ભરેલી પિચકારી ઝબોળી
તારા લાલ ગાલને રંગોથી દઉં ચોળી
ચાલને રમીએ રંગોથી મજાની હોળી,
ફાગણે આવી છે રંગોની હોળી
ખેલૈયાઓ મન મૂકીને રમે છે હોળી
ચાલને રમીએ રંગોથી મજાની હોળી,
રંગોથી ભરેલી લીધી જોને થાળી
ભીંજવી દઉં તારી ચૂંદડી ઘેરવાળી
ચાલને રમીએ રંગોથી મજાની હોળી.