કરામતી જાદુગર
કરામતી જાદુગર
એક નવ પલ્લવિત રુદન,
રેલાવે છે હાસ્ય ચારેકોર !
એનો જ પાન ખરી અંત,
વરસાવે છે રુદનની અતિવૃષ્ટિ ચારેકોર !
વાહ રે, કરામતોના જાદુગર,
થઈ લાચારી પણ લાચાર ! તારી આ કરામત આગળ,
નીતનવીન રંગો પુષ્પોના,
લલચાવે છે પતંગિયા ને ભ્રમર,
એજ પુષ્પોનાં કંટ,
ભોંકાય છે કાયમહી બની ખંજર !
વાહ રે, કરામતોના જાદુગર,
થઈ સુંદરતા પણ કાતિલ !તારી આ કરામત આગળ,
કાગ ને કોયલ વાન બંનેના એક,
ને વિવિધતા ભરી કંઠમાં !
આમ્રવને ઝૂલતી કોયલ,
ફેલાવે છે મધુરતા વનમાં,
વાહ રે, કરામતોના જાદુગર,
થઈ વાનથી પણ શ્રેષ્ઠ વાણી ! તારી આ કરામત આગળ,
કરે 'નેહ' પણ એક વિચાર,
એવી તો કરી તે અનેક કરામતો !
જીવનનાં રણમેદાને,
રમાડી તેં ચડતી-પડતીની રમતો !
વાહ રે, કરામતોના જાદુગર,
થઈ 'નેહ' પણ નતમસ્તક, તારી આ કરામત આગળ.