ઝીલ્યું ચોમાસું ઝરમર ઝરમર
ઝીલ્યું ચોમાસું ઝરમર ઝરમર
ગાજ્યાં ગગન ઘોર ગડગડ
ઝબૂકી વીજળી ઝળહળ ઝળહળ
અંગે ઓઢ્યું નભ નમણું ફરફર
ઝીલ્યું ચોમાસું ઝરમર ઝરમર,
પવન પાવડી ટપટપ ટપટપ
રમતું રમાડે હૈયું ખળખળ
ભાળ્યું ભીંનું ભોળું ભળભળ
રૂપલું સોણલું નીતર્યું ભરભર
ઝીલ્યું ચોમાસું ઝરમર ઝરમર,
ટહુક્યા મોરલા વનવન વનવન
છલક્યાં સરોવર છબછબ છબછબ
ધરણી લીલુડી છમછમ છમછમ
સરે સરિતાઓ સરસર સરસર
ઝીલ્યું ચોમાસું ઝરમર ઝરમર,
મિલન મોંઘેરાં મઘમઘ મઘમઘ
સૌરભમાં ડૂલ્યાં તનમન તનમન
વરસ્યાં ગમતીલાં ગીત ગુનગુન
છલકી સૃષ્ટિ આ રસભર રસભર
ઝીલ્યું ચોમાસું ઝરમર ઝરમર.