જાઉં છું;
જાઉં છું;
1 min
13.8K
ભાષા મળી છે ત્યારથી અટવાઈ જાઉં છું;
આધા-અધૂરા પાત્ર સમ છલકાઈ જાઉં છું.
વાચાળ શબ્દ-શબ્દથી ભરમાઈ જાઉં છું;
અર્થો વગર પર્યાયમાં વિખરાઈ જાઉં છું.
હે મિત્ર; એમ તો હતો સૂરજ સમો સબળ;
પામી પ્રકાશ પારકો બૂઝાઈ જાઉં છું.
બારાક્ષરીની બ્હાર ના નીકળી શકું અને
જોડાક્ષરો ને સંધિથી હરખાઈ જાઉં છું.
આસ્વાદ-કર્મ જ્યારથી ભૂલી ગયો સ્વજન;
હું પ્રકૃતિની જાળમાં ગૂંથાઈ જાઉં છું.
કોઈ ઉગારો એમ પણ ક્યાં ક્હી શકું છું હું;
મારો જ હાથ ઝાલીને સોંપાઈ જાઉં છું.
"ગુણવન્ત" જાતથી થયો જો બેખબર જરી;
ગજકેસરી છું; ગ્રાહથી ખેંચાઈ જાઉં છું.