એક મખમલી ખ્યાલ
એક મખમલી ખ્યાલ
એક મખમલી ખ્યાલ અમથો જ એનાં મધુર સંસ્મરણનો,
ખાલીપાની ખલીશોમાં ખળભળાટ કેવો મચાવી ગયો,
તાલાવેલી તુજને મનથી મળવાની ઉગી નીકળી અંદર,
વિચાર એ બે ઘડી મને થોડુંક વધારે જીવાડી ગયો,
ઠંડી ઠંડી હવાનો આ વરસતો કેવો વરસાદી વાયરો,
ને એકાંતના માહોલ વચ્ચે આજ હૈયું સળગાવી ગયો,
એક ઝંઝાવાત નિ:શબ્દનો ઉઠ્યો મુજ મન મહી ને,
આ હવાના કેનવાસ પર ઇન્દ્રધનુષી કવિતા લખી ગયો,
ને પછી કેવી દાદ હતી એની યાદ કેરા અસ્તિતવની,
કેફ અંતરની ઉદાસીનો પણ પછી આનંદ આપી ગયો,
ઋતુ ને આ વરસાદને ક્યાં રહ્યો છે કોઈ સંબંધ હવે,
ને વરતારો માવઠાંનો મને આજે પણ ડુબાડી ગયો,
"પરમ" નશો તારા નામનો છે જ કંઈક એવો હજુ પણ,
એની આંખનો એક જ ઈશારો મને "પાગલ" કરી ગયો.