અલગ
અલગ
ઘેટાં જેવા ટોળાથી બિલકુલ જ અલગ જાત અમારી,
જમાનાની ભીડથી ખૂબ જ દૂર અલગ જાત અમારી !
ગમે ત્યાં ઝળહળી રહી સભાઓ જૂઠી શાનથી ઠેર ઠેર,
એકલતાની જમાત જેવી જંગલી અલગ જાત અમારી !
જોખમ વધ્યું છે ભીડમાં ભળીને જીવંત રહેવાનું હવે,
એકાંતમાં સાવ સલામત એવી અલગ જાત અમારી !
જાતિના જંગલમાં કોમવાદની આગની લપટો ભલે ઊઠે,
વગર અનામતના વૃક્ષ જેવી અલગ જાત છે અમારી !
જડો જકડાયેલી રાખી છે જમીનની અંદર ટકી રહેવા,
છે અલગ આભ ઓઢેલા ઝાડ જેવી અલગ જાત અમારી !
સૂકા ઘાસની ભીડમાંથી અલગ થવાયું છે મહા મુસીબતે,
હવાના હડસેલે વહેતા તૃણ જેવી અલગ જાત અમારી !
જ્યાં છું જેવો છું, 'પરમ' તારી તલાશ છે જીવને જન્મોની,
ભીડથી વિરક્ત એવી 'પાગલ' ને અલગ જાત અમારી !