આવોને એકલતા ઘૂંટીએ

આવોને   એકલતા   ઘૂંટીએ…

 

ભૂલીને ભાંજગડ, ઓઢું હું ભોળપણ

વિસરી  જ કોલાહલ, ઝંખું હું પલપલ

ખૂલ્લા આકાશ નીચે ઝૂમીએ

આવોને   એકલતા   ઘૂંટીએ

 

ગગનનું છત અજબ, અડોઅડ ને દૂર

વગડાને   કંદરા ધરે કલરવના  નૂર

વરસતા આભલાને ઝીલીએ

આવોને   એકલતા   ઘૂંટીએ

 

મધુ વાસંતીના  વાયરા સજે ડાયરા

મનડાનાં ઓરતાં સંગ ઝરણાંના ઠૂમકા

કુદરતની  મસ્તીમાં  ડૂબીએ

આવોને   એકલતા   ઘૂંટીએ

 

નફરતને દઈ ઢોળી, હૈયાં હીંચોળી

ધરણ  ધરતું  રે  ઉમંગોની ઝોળી

વ્હાલનાં વધામણાં વલોવીએ

આવોને    એકલતા   ઘૂંટીએ

રમેશ પટેલ(આકાશદીપ)