આહ જીંદગી - વાહ જીંદગી

જો અને તો માં વસે આ જિંદગી,

એક શમણાં માં શ્વસે આ જિંદગી,

કોઈ આવી ને ગયું છે જ્યારથી

રોજ સાંજે સાંભરે આ જિંદગી,

જ્યાં થયું કે ફૂટશે તાજી કળી,

ત્યાંજ કૂંપળ ખેરવે આ જિંદગી,

એષણા સઘળી મરી પરવારે ને,

સાવ અણધારી ફળે આ જિંદગી,

ખોટુ જ્યાં ને ત્યાં સદા ભટક્યા કર્યું,

ભીતરે જો તું, જડે આ જિંદગી,

આશ-દીપક જલતો રાખ્યો છે સદા,

છો, પવન થઈ ઓલવે આ જિંદગી,

એક અટકળ સંગ ઉગતી રોજ, ને

એક સમજણમાં ઢળે આ જિંદગી,

થોડુ ગમતું-થોડુ અણગમતું મળે,

ચાહો એવી ના મળે આ જિંદગી !