ନାଁ ଟି ତାର ମନୁ
ନାଁ ଟି ତାର ମନୁ
ଚିକ ଚିକ ବାଲି ଉପରେ
ଖରାଟା ଦାଉ ଦାଉ ହେଇ ଜଳୁଛି
ସୂର୍ଯ୍ୟ ଦେବତା ଆଜି ଖୁବ ପ୍ରସନ୍ନ
ବିଲ ବାଡ଼ି ରାସ୍ତା ଘାଟ ବେଶ ତୋରା ଦିଶୁଚି
କେଇ ବର୍ଷ ପରେ
ମଜବୁତ ସ୍ମୃତିର ପୃଷ୍ଠଭୂମିକୁ ଫେରୁଛି
ମନଭିତରର ଆବେଗ କୋହ
ପଦାକୁ ଭିଟାମାଟି ସ୍ପର୍ଶ ଆସିବାକୁ ବ୍ୟସ୍ତ
ରେ ମୃତବତ ଶିହରଣ
ପୁଣି ଥରେ ଜୀବନ୍ୟାସ ପାଇବାକୁ ବ୍ୟଗ୍ର
ଅଭୁଲା ସ୍ମୃତିର ପ୍ରଥମ କିମ୍ବଦନ୍ତୀ ଚାଟଶାଳୀ
ଏଇ ମାତ୍ର ପାର ହେଲି
ଭୁଲି ହେଇନି ଏଯାଏ
ପଣିକିଆ ଘୋଷା
ପାଶୋରି ଗଲେ ସାରଙ୍କର ଲହ ଲହକା ବେତ
କାଦୁଅ ଲଟପଟ ଗାଁ ଦାଣ୍ଡ
ପିଚୁ କେବେଠୁ ହେଲାଣି?
ସଠିକ ଖବର ରଖିପାରିନି
ବୋଉ ଆଉ ନନା ଗଲା ପରେ
ଆସିବାଟା ଖୁବ ବେଶି ଥର ନୁହେଁ
ଆଜି ଆମ ଗାଁ ହାଇସ୍କୁଲର ପଚାଶ ବର୍ଷ ପୂର୍ତ୍ତି ଉତ୍ସବ
ଯୋଗ ଦେବାକୁ ଯାଉଛି ମୁଖ୍ୟ ଅତିଥି ଭାବେ
ଗର୍ବ ର ବିଷୟ ମୋ ପାଇଁ
ହେଲେ ତା ଠୁ ଖୁସିର ବିଷୟ
ପୁରୁଣା ସାଙ୍ଗସାଥି ମାନଙ୍କୁ ଭେଟିବି
କେତେ ପୁରୁଣା କଥା ବଖଣା ହବ
ଧୂଳିର ଆସ୍ତରଣ ସ୍ମୃତିପଟରୁ ପୋଛି ହେଇଯିବ
ଏଇତ ବାଂଫି ପାଖ ପଥର ଉପରେ
ହରିଆ କକା ବସିଛନ୍ତି
ହେଲେ ମତେ ଚିହ୍ନି ପାରିଲେନି
ବେଶ ସ୍ୱାଭାବିକ କଥା
ଚିନ୍ହା ଦେବାରୁ ଜାଣିଲେ
ଆଖି ଛଳ ଛଳ କରି ମନୁ କଥା କହି ପକେଇଲେ
କ୍ଷଣିକ ପାଇଁ ସ୍ତବ୍ଧ ହୋଇଗଲି
ହରିଆ କାକାଙ୍କର ପୁଅ
ମୋର ସବୁଠାରୁ ଅନ୍ତରଙ୍ଗ ସାଙ୍ଗ
କ୍ଲାସ ରେ ସବୁଠୁ ଭଲ ଗୀତ ଗାଉଥିବା
ସହପାଠୀ ମନୁ ଆଉ ନାହିଁ
ନଈରୁ ମାଛ ଧରିବା ବାଉଁଶ ବଣରେ ବଇଁଶୀ ଫୁଙ୍କିବା
ଖେତରୁ କଷି କାକୁଡି ଚୋରି କରିବା
ସଞ୍ଜ ନଇଁ ଆସିଲା ବେଳକୁ ସାଇକଲ ଧରି
ବଜାର ଆଡେ ଯିବା
ଘରେ ନକହି ଚାଟ ଗୁପଚୁପ ଖାଇବା ଇତ୍ୟାଦି ଇତ୍ୟାଦି
ସବୁ ପ୍ରାଞ୍ଜଳ ଭାବେ ମାନସ ପଟରେ ଉଙ୍କି ମାରିଲେଣି
ଅତୀତ ନାମ୍ନୀ ସୁପ୍ତ ଆଗ୍ନେୟଗିରିରୁ ଆରମ୍ଭ ହେଲାଣି
ପୁଣି ଉଦଗୀରଣ
ସିଏ ସିନା ପାଉଁଶ ହୋଇ ଭାସିଯାଇଛି
ନଈର ସେଇ ସର୍ପିଳ ପଥରେ
ହେଲେ ଛାଡି ଯାଇଛି କେତୋଟି ଅନ୍ତରଙ୍ଗ ମୁହୂର୍ତ୍ତ
ଚିରଦିନ ଲାଗି
ଅନ୍ୟମନସ୍କ ହେଇ କେତେବେଳେ ନଈ କୂଳ ଆଡେ ମାଡିଯାଇଛି
ନାମକୁ ମାତ୍ର ନଈ ସିଏ ଆଜି
ବଂଚିବାର ପ୍ରୟାସ ନେଇ
ସଂଗ୍ରାମ ଜାରି ରଖିଛି
ବଂଚେଇ ରଖିଛି ନିଜ ଭିତରେ "ମନୁ"କୁ
ଆଉ କିଛି ଦୁଲ୍ଲଭ କିଛି ନିଆରା ସନ୍ତକ ମାନଙ୍କୁ
ଡ୍ରାଇଭର ଡାକaରେ ପ୍ରକୃତିସ୍ଥ ହେଲି
"ସାର, ଡେରି ହେଲାଣି
ସେପଟେ ଫଙ୍କସନ ଆରମ୍ଭ ହେଇଯିବଣି
ଆସନ୍ତୁ ଯିବା "
"ହଁ ଚାଲ, ୟା’ ଭିତରେ ଏତେ ବେଳ ହେଇଗଲାଣି !"
"ଆପଣ ତ ଘଡ଼ିଏ ହେଲାଣି ଏଇ ସୁକୁଲା ନଈଟାକୁ ଅନେଇ କି
ଠିଆ ହେଇଛନ୍ତି ଧାର ଅଛି ନ ସୁଅ ଅଛି?"
"ତୁ ବୁଝି ପାରିବୁନିରେ
ଏଇ ନଈ ଗର୍ଭରେ ପରସ୍ତ ପରସ୍ତ ସୁନେଲି ଅତୀତ ଅଛି
ଆଉ ସେଇ ମୂଳଦୁଆକୁ ନେଇ ମୋର ବର୍ତ୍ତମାନ ।"